Bal 10 Méint no hirem Amtsuntrëtt am Grand-Duché seet d'US-Ambassadrice Stacey Feinberg, datt Lëtzebuerg den Erwaardungen, déi si bei hirer Arrivée hat, gerecht gi wier. An hiren éischte Méint huet si sech virun allem drop konzentréiert, Relatiounen opzebauen, déi wirtschaftlech Verbindungen ze stäerken an eng nei deeglech Fluchverbindung mat den USA op d'Been ze stellen.
Am Virfeld vum 25. Joresdag vun den Attentater vum 11. September 2001 schwätzt si och iwwer den nationalen Zesummenhalt, d'Erënnerung un d'Attentater an d'Wäerter, déi si duerch hir diplomatesch Aarbecht vermëttele wëll.
Wéi d'Stacey Feinberg zu Lëtzebuerg ukomm ass, hat si d'Land als "Bijou vun Europa" beschriwwen. Bal 10 Méint méi spéit geet si nach e Schratt méi wäit.
"Et ass wierklech e Bijou. Et ass e 'Krounbijou' vun Europa", sot si. Si huet dobäi déi häerzlech Opnam, déi international Ausriichtung an d'Sympathie fir d'USA ervirgehuewen, déi si zu Lëtzebuerg erlieft hätt.
Si huet och déi enk Zesummenaarbecht vun der Ambassade mat de Lëtzebuerger Ministèrë betount. D'Tatsaach, datt ee séier zesummeschaffe kéint, hätt gehollef, gemeinsam Ziler virunzebréngen.
D'Stacey Feinberg huet sech mëttlerweil och e puer lokal Gewunnechten ugëeegent, dorënner déi üblech dräi Kussen op de Bak, och wa si vun Natur aus éischter "eent ass, dat gär ëmäermelt".
Och un déi iwwersiichtlech Dimensioune vum Land huet si sech gewinnt. Si vergläicht Lëtzebuerg mat engem Uni-Campus, wou d'Nouvelle vun engem gemeinsame Mëttegiessen heiansdo schonn d'Ronn gemaach huet, éier déi concernéiert Leit iwwerhaapt erëm doheem sinn.
Hir diplomatesch Approche baséiert staark op hirer Erfarung als Geschäftsfra, ënnersträicht d'Stacey Feinberg: "Ech gi bei allem, wat ech maachen, strategesch vir."
Hir éischt Aufgab wier et gewiescht, erauszefannen, wéi eng Leit an Institutioune gutt mateneen zesummeschaffen. Duerno hätt si probéiert, gemeinsam Ziler festzeleeën, Hindernisser ze identifizéieren an dat néidegt Vertrauen opzebauen, fir méi laangfristeg Initiativen ëmzesetzen.
Dëse Prozess steet am Mëttelpunkt vun hirem Zil, méi amerikanesch Investitiounen op Lëtzebuerg ze kréien a gläichzäiteg Lëtzebuerger Entreprisen dobäi ze hëllefen, sech um US-Marché auszebauen. An der nächster Phas soll et der Ambassadrice no eng méi enk Koordinatioun mat de Ministeren an anere Partner ginn, amplaz datt verschidden Initiativen, déi sech eventuell iwwerschneiden, parallel lafen.
D'Ënnerstëtzung vu weiblechen Entrepreneure war eng aner perséinlech Prioritéit. D'Stacey Feinberg huet Kaffisdëscher an der Residenz vun der Ambassadrice organiséiert, bei deene Geschäftsfraen d'Méiglechkeet kruten, Kontakter, Ressourcen, Problemer a Rotschléi auszetauschen. Vill vun de Fraen, déi si getraff hätt, hätte sech eleng gelooss gefillt an et hätt hinnen un engem Reseau vu Leit gefeelt, déi mat änlechen Erausfuerderunge konfrontéiert wieren, sou d'Ambassadrice.
Zanter dem Ufank vun hirem Mandat hätt si probéiert, dat "frëndlecht Gesiicht vun Amerika" ze sinn an d'Politik vum US-President Donald Trump ze iwwersetzen.
"Well ech schwätzen 'Trump', wat net ëmmer einfach ze verstoen ass", sou d'Stacey Feinberg mat engem Laachen.
Konsequent sinn, wier d'Basis vun hire Relatiounen zu Lëtzebuerg, sot si. Si géif näischt verspriechen, wat si net hale kéint, a géif besonnesche Wäert op Vertrauen an Zesummenaarbecht leeën.
"Mäi Wuert ass mäi Kontrakt", huet si nach eng Kéier betount, nodeems si schonn an hirem éischten Interview als US-Ambassadrice zu Lëtzebuerg dës Approche ënnerstrach hat.
Dat warscheinlech konkretste Resultat vun der Aarbecht vun der US-Ambassadrice ass déi geplangte Fluchverbindung vu United Airlines tëscht Lëtzebuerg an Newark, déi den 2. Abrëll 2027 soll starten.
D'Ambassadrice huet eng direkt Verbindung zur Prioritéit gemaach, nodeems si gewuer gi war, datt et keng direkt Flich tëscht deenen zwee Länner gëtt. Nodeems hir ëmmer nees gesot gi war, et wier extrem schwéier, esou eng Verbindung op d'Been ze stellen, huet si sech u lux-Airport, d'Ministesch Yuriko Backes, Luxair an eng Rei amerikanesch an international Fluchgesellschafte geriicht.
"Et gouf mir gesot, et wier onméiglech. Als Amerikanerin mécht dat, datt ech et nach méi wëll maachen ... an nach méi séier", sou d'Stacey Feinberg vis-à-vis RTL. Si huet de Start vun der Verbindung als "Domino-Effekt" beschriwwen, deen déi zukünfteg Zesummenaarbecht méi einfach maache kéint.
Déi meescht Fluchgesellschaften hätten d'Iddi ofgeleent. United hätt awer no engem Businessplang gefrot, dee weist, datt d'Verbindung rentabel kéint sinn. Doropshin huet d'Ambassadrice sech mat Generaldirekteren, Affekoten-Etüden, Regierungsvertrieder an anere Membere vun der Lëtzebuerger Geschäftswelt ausgetosch.
An Ëmfroe goufe potenziell Passagéier gefrot, wéi dacks si d'Verbindung géifen notzen an a wéi engem Mooss de Präis fir si eng Roll géif spillen. "Dat Eenzegt, wat fir Geschäftsleit méi wäert ass wéi Suen, ass Zäit", sot si.
D'Argumenter fir d'Verbindung waren awer net nëmme vu wirtschaftlecher Natur. D'Stacey Feinberg hätt och vu Leit zu Lëtzebuerg héieren, fir déi et schwéier wier, Familljememberen a verschiddenen Deeler vun den USA ze besichen. Gläichzäiteg géifen et Amerikaner ginn, déi méi einfach an de Grand-Duché komme wëllen.
United huet sech schlussendlech fir eng deeglech Verbindung decidéiert – e wichtege Punkt fir d'Ambassadrice. Leit kéinten hiert Liewen net mat engem oder zwee Flich d'Woch organiséieren, huet si argumentéiert.
Op der Streck sollen nei Airbus-A321XLR-Fligeren agesat ginn. Dës solle mat 20 Sëtzer, déi sech komplett flaach leeë loossen, 12 Premium-Economy-Sëtzer an enger Economy-Klass ekipéiert sinn, déi d'Stacey Feinberg als "spektakulär" beschreift an déi hirer Meenung no mat der Premium Economy vun anere Fluchgesellschafte mathale kéint.
Ob d'Verbindung laangfristeg e Succès gëtt, hänkt elo vun de Passagéier of. D'Stacey Feinberg huet sech dofir mat engem kloren Appell un d'Geschäftswelt geriicht: "Dir hutt mech drëms gebiedelt, elo bucht d'Flich!"
En nächste wichtege Schratt wier elo, datt Lëtzebuerg dem amerikanesche Global-Entry-Programm bäitriede kann. Dësen erlaabt et Passagéier, déi am viraus kontrolléiert an zougelooss goufen, méi séier duerch d'Immigratiounskontroll ze kommen.
Fir d'Ambassadrice ass déi nei Fluchverbindung den éischte Schrëtt an engem méi breeden Effort, fir den Tourismus, d'Investitiounen an déi bilateral Zesummenaarbecht auszebauen.
Op d'Fro no hirem nächste groussen Zil wollt si nach keng Detailer verroden. "Bleift gespaant", sot si an huet awer ugedeit, datt si laangfristeg wéilt hëllefen, Lëtzebuerg zur "Weltraum-Haaptstad vun der EU" ze maachen.
Fir d'Stacey Feinberg sinn d'Attentater vum 11. September 2001 bis haut eng ganz perséinlech Erënnerung. Si war mat hirem eelste Jong Robbie op sengem éischte Schouldag, wéi en aneren Elterendeel gemellt huet, datt e Fliger an de World Trade Center geflu wier.
Am Ufank hätt de Grupp vun Eltere gemengt, et wier en Accident gewiescht. Wéi d'Nouvelle vum zweete Crash koum, wier kloer gewiescht, datt d'USA attackéiert goufen.
Well Manhattan ofgespaart war an d'Kommunikatioun net méi richteg funktionéiert huet, ass d'Stacey Feinberg an der Schoul bliwwen, fir sech ëm Kanner ze këmmeren, deenen hir Elteren net aus der Stad zeréckkomme konnten. Si erënnert sech un d'Angscht vun deem Dag, awer och un de Patriotismus, de Courage an d'Solidaritéit, déi duerno ze spiere waren.
"Et huet d'USA op eng Manéier zesummebruecht, wéi ech et a mengem Liewen nach ni gesinn hat", sot si.
Well mëttlerweil Generatiounen opgewuess sinn, déi keng eegen Erënnerungen un d'Attentater hunn, ass fir d'Stacey Feinberg déi zentral Léier, datt eng Gemeinschaft keng Katastroph soll brauchen, fir sech ëm eneen ze këmmeren. D'Leit sollte probéieren, déi selwecht Solidaritéit och am normalen Alldag ze weisen.
"Et ass schued, datt et esou eppes brauch, e 'Black-Swan-Event', esou e schrecklecht Evenement, fir Gemeinschaften zesummenzebréngen", sou d'Stacey Feinberg.
D'US-Ambassade wäert de Joresdag mat enger Fändel-Zeremonie an enger Gedenkminutt fir déi 2.977 Affer commemoréieren. Gläichzäiteg sollen d'Rettungsdéngschter, Zivilisten a Privatleit gewierdegt ginn, déi duerch hire Courage an hir Hëllefsbereetschaft dat verkierpert hunn, wat si den "American Spirit" nennt.
Trotz den aktuelle politeschen Differenzen an den USA bleift d'Ambassadrice optimistesch. Amerikaner kéinten ënnerschiddlecher Meenung sinn, sot si. D'Meenungsfräiheet an den Austausch vun ënnerschiddlechen Iddie wiere fundamental.
Et géif dorëms goen, sech géigesäiteg nozelauschteren a vuneneen ze léieren, amplaz sech unzejäizen oder perséinlech unzegräifen. Et ass e Prinzip, vun deem si hofft, datt en och d'Frëndschaft tëscht den USA a Lëtzebuerg weider stäerke wäert.
En aneren Datum, dee fir d'Ambassadrice mat engem perséinleche Verloscht verbonnen ass, ass den 10. September 2025. Deen Dag gouf de rietse politeschen Aktivist Charlie Kirk, en enke Frënd vum Stacey Feinberg, erschoss, wärend hien um Campus vun der Utah Valley University eng Ried gehalen huet.
