Ronn 700 Leefer a Leeferinne sinn un den Depart vun de verschiddene Coursse vum Ultratrail Mëllerdall gaangen. E Samschdeg um Hallefnuecht scho goufen d'Leefer vum Ultra-Trail, deen iwwer 111 Kilometer an 3.500 Héichtemeter gaangen ass, op d'Streck geschéckt. No 10 Stonnen, 51 Minutten an 21 Sekonnen huet sech de Fransous Alexandre Mayer e Samschdeg d'Victoire geséchert. Op d'Plazen 2 an 3 sinn de Boris Suselj (11:14:41 Stonnen) an den Arthur Bodet (11:32:54 Stonnen) gelaf. Beschte Lëtzebuerger war de Christian Andre als 8. an 12 Stonnen, 22 Minutten an 10 Sekonnen.
Séiersten Damm war d'Lëtzebuergerin Shefi Xhaferaj. Si huet 12 Stonnen, 12 Minutten a 40 Sekonne gebraucht. Op déi 2. Plaz ass d'Belsch Morgane Dethier an 13 Stonnen, 13 Minutten a 6 Sekonne komm.
D'Shefi Xhaferaj konnt den Ultratrail Mëllerdall scho fir d'fënnefte Kéier gewannen.
Donieft gouf et nach Courssen iwwer 75 Kilometer, 35 Kilometer, 21 Kilometer an 10 Kilometer.
