E Mann, deen zu Lëtzebuerg gebuer gouf, soll zu Lissabon ee vun de Männer ugestouss hunn, déi him kuerz virdrun eng deier Rolex-Auer geklaut haten. De Mann op engem Moto gouf dobäi schwéier blesséiert an ass spéider un de Verletzunge gestuerwen.
Wéi verschidde portugisesch Medien mellen, lieft de Betraffenen zwar säi ganzt Liewen a Portugal, ass awer an der Regioun Minho ënner dem Spëtznumm "de Schwäizer" bekannt. De Mann ass an de Véierzeger an huet vill Immobilien an der Géigend vu Braga a Famalicão.
Leit aus sengem Ëmfeld beschreiwen hien als een, dee seet, wat hie mengt a sech net einfach alles gefale léisst. Dat kéint erklären, firwat hien nom Déifstall esou reagéiert huet an dem Déif nogefuer ass.
De Medieberichter no war hien aus beruffleche Grënn zu Lissabon. Nodeems hie seng Auer an eng Goldkette am Wäert vu méi wéi 100.000 Euro geklaut krut, hätt hien d'Déif mat sengem Auto verfollegt, obwuel verschiddener vun hinne arméiert gewiescht solle sinn.
D'Poursuite huet opgehalen, wéi ee vun den Täter, deen op engem Moto ënnerwee war, gefall ass. De Moto gouf dobäi vum Auto vum Déifstall-Affer getraff. Den Déif ass spéider un de Blessure gestuerwen.
De Fall suergt a Portugal fir vill Opmierksamkeet. Dat läit och dorun, datt de Chauffer zwar zënter Joren a Portugal lieft, awer zu Lëtzebuerg gebuer gouf an nach ëmmer familiär Verbindungen am Land huet. D'Ermëttler versichen elo genee ze klären, wéi et zu der Poursuite an zur Kollisioun mat déidleche Suitte komm ass.
