D'Kand aus dem däitschen Diepholz an Niedersachsen war mat senger Mamm am Auto an huet decidéiert, den Noutruff ze wielen. De Grond: d'Mamm war därmoossen alkoholiséiert, dass si net méi riichtaus fuere konnt. Dat huet d'lokal Police en Dënschdeg matgedeelt.
Dat verängschtegt Kand konnt mat Hëllef vun der Fräispriechanlag der Police uruffen. An Tréinen opgeléist huet hatt de Beamten erzielt, dass seng Mamm de Won am Zickzack steiert an och ëmmer nees op d'Géigespuer gerode géif.
Eng Policepatrull huet de Won lokaliséiert an d'Mamm direkt gestoppt. D'Fra vu 40 Joer hätt "ënner eminentem Afloss vun Alkohol" gestanen a wier net méi kapabel gewiescht, nach Auto ze fueren. En éischten Alkoholtest huet e Wäert vun iwwer 1,9 Promill festgestallt a si krut och direkt de Fürerschäin ewechgeholl.
D'Kand ass nom Virfall bei enger adequater Opsiichtspersoun aus der Famill ënnerdaach komm. Geschitt ass dat Ganzt scho leschte Samschdeg ëm Mëtternuecht. D'Mamm erwaart elo eng Procédure pénale.
