Amplaz d'Déieren a grousser Zuel ze erschéissen, gi se gefaangen, ënnersicht a wa méiglech nees wäit ewech vu Wunngebidder fräigelooss.
Dëse Programm leeft schonn zënter 1995, nodeems d'Autoritéiten e Réckgang vun der Bierepopulatioun festgestallt haten. Nieft dem Fänken a Markéiere vun den Déiere goufen iwwer 3.000 Kilometer un Zénk ronderëm Felder, Stied a Flëss opgeriicht. Och speziell ausgebilte Muppen hëllefen, Bieren aus bebaute Gebidder ze verdreiwen.
A Japan hu Bierenattacken an de leschte Joren awer däitlech zougeholl. Am leschte Joer goufen e Rekord vu ronn 14.000 Bieren erschoss. D'Ursaache fir déi méi dacks Begéinunge si villfälteg: ënner anerem verännert sech d'Verfügbarkeet vu Liewensmëttel duerch de Klimawandel, an d'Landflucht féiert dozou, datt d'Bierger manner an de Bëscher aktiv sinn. Och verloosse Friichte wéi Kakien zéien d'Déieren un.
D'Fuerscherin Akiko Takii ass der Meenung, datt net all Bieren aggressiv sinn an datt et virun allem dorëms geet, problematesch Déieren z'erkennen. Zu Nagano ass d'Zuel vun de gemellten Tëschefäll an de leschte Jore relativ stabil bliwwen. Gläichzäiteg gëtt an de Schoule Sensibiliséierungsaarbecht geleescht, fir de Kanner de richtegen Ëmgang mat Bieren ze weisen.
D'Zil ass, de Mënschen an den Déieren e méiglechst konfliktfräit Zesummeliewen ze erméiglechen.
