Vun der Police huet et geheescht, datt um Cents an der Stad zwee Abréch géint 3 Auer gemellt goufen. Betraff waren zwee Haiser, déi net wäit vuneneen ewech louchen. Am Kader vun der Sich konnt ee Verdächtege gestallt ginn, eng zweet Persoun ass geflücht.
Et ware méi Unitéiten un der Sich no de Kriminelle bedeelegt an um fréie Moie war och de Policehelikopter am Asaz. D'Police hat d'Populatioun awer och ëm Hëllef gefrot, esou sollten d'Bierger verdächteg Observatiounen direkt dem 113 mellen. Kuerz no 15 Auer huet d'Police matgedeelt, datt den Asaz eriwwer wier. D'Ermëttlunge lafen.
