Um leschten Dag vun der Liichtathleetik-EM zu Birmingham an England war mam Ruben Querinjean och e Lëtzebuerger am Asaz. De 24 Joer ale Leefer ass e Sonndeg den Owend um 21:50 Auer Lëtzebuerger Zäit iwwer 3.000 Meter Steeple an der Finall ugetrueden.
De Lëtzebuerger, aktuell 13. an der Weltranglëscht, ass an enger Zäit vun 8 Minutten, 25 Sekonnen an 61 Honnertstel op déi sensationell 2. Plaz gelaf. De Querinjean louch déi éischt 2.000 Meter quasi dauernd ëm d'Positioun 8 bis 9, éier hie sech op de leschte 600 Meter no vir konnt schaffen an du säi Sprint no vir lancéiert huet.
No enger sensationeller an ofgekläerter Schlussphas vum Ruben Querinjean ass um Enn Sëlwer fir de Lëtzebuerger erausgesprongen.
Bal genee 20 Joer nom David Fiegen huet Lëtzebuerg also een neie Vize-Europameeschter an der Liichtathleetik.
An enger Course, déi vun der Vitess hier ganz lues ugaangen ass, huet sech um Enn de Frederik Ruppert aus Däitschland mat engem staarke Schlusssprint den Europameeschtertitel geséchert, mat enger Zäit vun 08:25.33 Minutten. De Podium komplettéiert nieft dem Zweete Querinjean op der drëtter Plaz mam Karl Bebendorf (8:26:65 Minutten) e weideren däitschen Athlet.
