No zwee rezente Fäll vu sexualiséierten Iwwergrëff zu Beetebuerg konnt elo eng verdächteg Persoun fonnt ginn. Wéi de Parquet e Samschdeg de Moien an engem Communiqué matdeelt, wier e Jong vun 12 Joer als Verdächtegen ermëttelt ginn. Den Dossier wier un d'Jugendschutz-Departement vum Parquet weider geleet ginn. Wéinst dem Alter vum Jong géingen aus Jugendschutz-Grënn zu dësem Zäitpunkt keng weider Informatioune matgedeelt ginn. De Parquet erënnert och un d'Présomption d'innocence.
Den 28. August an den 2. September waren eng Fra vun 19 Joer an e Meedchen zu Beetebuerg vun enger onbekannter Persoun sexuell belästegt, ugepaakt a verfollegt ginn.
